KALIBO, Aklan — Kabilugan nga 82 nga indibidwal ro naaresto it kapulisan sa Western Visayas bangud sa pag-eabag sa gun ban it Commission on Elections (COMELEC) nga nag-umpisa ko Enero 12 ag nagtapos ko Hunyo 12.
Suno kay P/Lt. Col. Arnel Solis, tagapaghambae it Police Regional Office (PRO)-6 nga kaabuan sa mga nag-eabag sa gun ban hay mga sibilyan nga nag-abot sa 78.
Ap-at man ro uniformed personnel.
Naga-abot mat’a sa 82 nga nagkaeain-eain nga armas ro narekober kaibahan ro ap-at nga gun replica ag sangka pampasabog.
Gin klaru man ni Solis nga bukon eon it kaibahan sa datos ro probinsiya it Negros Occidental ag siyudad it Bacolod bangud nga may separado eon sanda nga inter-agency Regional Joint Peace and Security Coordinating Center sa idaeum it Negros Island Region.
Ginpahayag dugang nga ro matawhay nga pagpatigayon it eleksyon hay tuga it hugut nga implementasyon it mga checkpoint ag ro pagserbi it mga warrant kontra sa mga nagapanag-iya it ilegal nga armas.
Ro Aklan Police Provincial Office hay nakalista it 4 nga gun ban violators.
Sa pihak kara, maskin nga tapos eon suno kana ro Comelec gun ban, apang nagapadayun ro andang kampanya kontra sa loose firearms pinaagi sa pagpatigayon it search warrant operations.
Kadungan kara, gina engganyo nana ro mga indibidwal nga nagahupot it undocumented firearms nga temporaryong isurender sa pinakamaeapit nga police station agud nga makalikaw sa kaso.
