KALIBO, Aklan — Nagapangatubang sa reklamong pag-eabag sa RA 9165 ukon Comprehensive Dangerous Drugs Act of 2002 ro tatlong drug personalities nga naaresto sa ginkasa nga buy-bust operation it mga awtoridad sa Sitio Looban, Brgy. New Buswang, Kalibo, bandang alas-8 it gabi-i it Huwebes, Hunyo 19.
Suno kay Jyx Escrupolo, investigation agent 3 it Philippine Drug Enforcement Agency (PDEA)-Aklan nga samtang nagapatigayon it buy-bust operation ro mga awtoridad para madakpan ro target nga si Raquilino Roldan, alyas “Tuk-Tuk”, 44 anyos ag residente it nasambit nga lugar hay naaktuhan man nga naga-pot session sa sueod it maisot nga kwarto it baeay ro daywang iba pa nana nga kaibahan nga sanday Raymond Hilario, 39-anyos, residente it nasambit nga lugar ag Danny Carillo, 55-anyos, residente it Brgy. Bulwang, Numancia.
Ginasugid nga ko nagtaliwan pa nga dag-on na-monitor ro iligal nga aktibidad ni Roldan.
Ginpahayag ni Escrupolo nga base pa sa andang monitoring, drug surrenderer ro andang target nga si Roldan.
Nabo-oe kana ro 9 tanan nga sachet it suspected shabu, sangka sachet it ginadudahan nga ginpamaea nga dahon it marijuana ag P25,000 nga buy-bust money.
Narekober man sa boesa ni Carillo ro container nga may sueod nga ap-at nga sachet it ginadudahan nga shabu ag sambilog pang sachet it shabu sa likod it pungkuan ni Hilario.
Dere-deretso sigon ro andang operasyon agud nga matapna ro pagkalhit it illegal nga droga eabi pa nga pormal eon nga nagbukas ro klase .
Naalarma sigon sanda bangud nga ro baeay it subject person nga si Roldan hay walking distance eamang sa sangka eskwelahan sa lugar.
Ro operasyon hay pinaagi sa gintingub nga pwersa it PDEA Aklan, PDEU-Aklan, ag Kalibo PNP.
