KALIBO, Aklan—Gintambungan it libo-libong deboto ro ginpatigayon nga pilgrim’s mass sa kaadlawan it kapyestahan ni Sr. Sto. Niño de Kalibo.
Ginpangunahan ni Most. Rev. Victor Bendico, D.D., Apostolic Administrator it Diocese of Kalibo ro seremonya kaibahan ro mga kaparian sa Aklan.
Sa anang homiliya, ginpunto nana nga ro Sto. Niño hay sangka onga, maisot, fragile apang maisog.
Sa pihak nga imaw hay onga, imaw hay may gahom nga mag-eowas sa kada isaea katon.
Mag-eowas kara, nasambit man it Obispo ro presenteng nagakatabo nga korapsyon kon sa siin apektado ag nagasakripisyo ro mga kubos.
Ro Sto. Niño de Kalibo ro rason kon ham-an it may Kalibo Ati-Atihan Festival nga dag-unan nga ginaselebrar nga ginadayo it mga bisita, bakasyunista, turista ag maabong iba pa.
Ro pilgrim’s mass hay ro pinaka-highlights it selebrasyon kon sa siin ginsundan raya it pag-prosisyon sa imahe it Sto. Niño bilang hari it okasyon kasunod man ro 31 ka mga tribu ag grupo nga naging kaparte it Sadsad Ati-Atihan competition.
Ro Kalibo Ati- Atihan Festival hay ginakabig man nga Mother of All Philippine Festivals.
