Ginadayaw makaron it mga Chinese netizens ro ginakabig nga “Indomitable Bamboo” sa Xinchang County, Zhejiang Province, matapos raya nga maging simbolo it kapag-on ag pag-eaum.
Ro nasambit nga butong hat himalang nagtubo sa sueod it poste it iwag maeapit sa World Trade Plaza.
Suno sa report, nagsueod ro ugat it butong sa sangka maisot nga siwang sa ubos it poste ag nagsaka paibabaw sa pihak it kawad-an it kahayag ag espasyo sa sueod it makipot nga poste.
Nakibot ro mga residente kat makitang nagguwa raya sa alipunto it poste nga may madamoe ag berdeng mga dahon, medyu nagawagayway it kadaeag-an.
Ginpaathag it mga eksperto, naging posible raya bangud sa complex root system it butong nga makasarang nga maghigop it bastante nga tubi ag nutrisyon halin sa eugta agud nga suportahan ro anang pagbahoe maskin nga owa naagtunan it init it adlaw.
Nadiskubre raya it residenteng si Mr. Jia samtang nagatikang kaibahan ro anang mga unga.
Ro anang simpleng video hay nag-viral ag umani it milyun-milyong views, rason nga ginadayo raya it mga ginikanan nga gusto nga ituro sa andang mga unga ro leksiyon it kapag-on nga maskin sa pinakamadueom ag pinaka-hugut nga sitwasyon, posible sa gihapon nga mag-umwad ag mag-asenso basta nga indi magasurender.
