KALIBO, Aklan — Ginmandu eon it Office of Civil Defense (OCD) Region 6 ro preemptive evacuation sa bilog nga Western Visayas sa atubang it ginaeauman nga pag-landfall sa rehiyon it Tropical Storm Basyang gabi-i it Biyernes, Pebrero 6, 2026.
Suno kay OCD Regional Director Raul Fernandez, gin-umpisahan eon ro pagbakwit sa mga residente halin sa mga lugar nga baeaha-on, landslide prone area, ag mga posibleng pagatamaan it storm surge bilang pagpahaum sa ginaeauman nga mga mabaskog nga uean ag hangin, kun sa siin, una sa Orange Rainfall Warning ro mga probinsiya sa rehiyon mag-eowas sa Aklan nga una sa Yellow Rainfall Warning.
Sa anda sigon nga ginpaguwa nga urgent memorandum, ginmanduan ro tanan nga Local Disaster Risk Reduction and Management Councils (LDRRMCs) nga insigidang ipatuman ro mga evacuation, eabi eon sa mga high-risk nga barangay sa southern Iloilo ag southern Antique.
Indi eon sigon dapat nga mag-uyang it tiempo ro mga lokal nga opisyal para boe-on ro mga residente sa danger zones.
Dugang pa kara nga ginpaidaeum eon sa red alert ro andang taeatapan kaibahan ro Regional Disaster Risk Reduction and Management Council umpisa makaron nga adlaw ag ginpatigayon ro tanan nga preparasyon sa bagyong Basyang nga ginaeauman nga magadaea it mabaskog nga uean.
Ginpadumdum man kara sa mga residente nga maging vigilante ag insigida nga magsunod sa ginamandu kanda .
