Sangka opisyal it Vatican sa Pilipinas ro nag-engganyo sa mga magkarelasyon nga i-selebrar ro Valentine’s Day pinaagi sa pagtambong sa Misa.
Gin-engganyo ni Papal Nuncio to the Philippines Archbishop Charles Brown ro mga pamatan-on eabi eon ro mga mag-dyowa nga magsimba sa Pebrero 14.
Suno sa opisyal it Vatican, kapareho it tradisyon it maabu nga mga Pilipino nga nagatambong sa Simbang Gabi kada Paskwa, pwede man nga maging mapuslanon ro tradisyon sa pagtambong sa Misa sa kapistahan ni St. Valentine.
Ginpahayag pa it opisyal it Simbahan nga kun ro sangka eaeaki hay Katoliko nga interesado sa sangka babayeng Katoliko, pwede nana raya nga imbitahan sa simbahan.
Nauna eon nga ginkontra it Simbahang Katoliko ro pilang inisyatibo it gobyerno angot sa pagpanupod it condom kada Valentine’s Day.
Suno sa Simbahan, ro mga makarondaya nga tikang hay kabaliskaran sa mga ginaturo kara angot sa kasagraduhan it kabuhi ag sa pagpati nga ro seksuwal nga relasyon hay para eamang sa mag-asawa.
Ap-at nga adlaw pagkatapos it Valentine’s Day, sa Pebrero 18, ginadumdum it mga Katoliko ro Ash Wednesday, nga senyales it pag-umpisa it Kuwaresma ukon ro 40-diyas nga tiempo it pagpangamuyo, paghinoesoe ag pagpu-asa.
