Nagtuga it nerbyos ag kahadlok sa mga Pinoy sa Kuwait ro gintingob nga pag-atake it Amerika ag Israel sa nasyon it Iran.
Suno kay Bombo International Correspondent Romela Retoran, sangka overseas Filipino worker ag kapin sa ap-at nga dag-on eon nga nagatrabaho sa nasambit nga nasyon, unang beses pa eamang nana raya naeksperyensyahan rason nga tuman gid ro ana nga koeba nga nabatyagan kat mabatian ag mabatyagan sa andang building nga ginaistaran ro sunod-sunod nga pagsigabong it mga missiles.
Maskin ro anang mga amo suno kana hay nakibot man sa hitabo apang ginpakalma ro andang mga kaugalingon ag ginpahimos it andang mga importanteng kagamitan agud nga maging haom ro mga raya anumang oras kon kinahang-ean eon nanda nga magsueod sa bomb shelter ukon magbakwit sa mas eowas nga lugar.
Sa makaron suno kana hay kanselado ro mga flight sa Kuwait airport bangud sa sigidas ro mga pagsabog ag eaban nga pag-atake it mga missiles hay naintercept it iron dome it nasyon.
