Nakataeanang ipatigayon sa isla it Boracay sa Marso 21 ro kauna-unahang pagselebrar it Hari Raya ukon Eid al-Fitr, sangka importanteng pista sa Islam nga nagamarka it pagtatapos it balaan nga buean it Ramadan.
Suno kay Malay Frolibar Bautista, tuyo it nasambit nga selebrasyon nga himuong mas bukas ag “Muslim-friendly” ro kilaeang tourist destination para sa mga lokal ag dumueoong bisita.
Igapatigayon ro selebrasyon sa Boracay Newcoast kon sa siin makaangkon it mga kultural nga performance, family activities, ag community gatherings nga bukas sa mga Muslim ag bukon it Muslim.
May nakataeanang lugar man para sa pangamuyo ag pagpamaeandong it mga bisita.
Kaparte man it programa ro espesyal nga halal festival dinner nga ginpahaom ni Tahir Malikol, nga tampok ro mga pagkaong inspirasyon it halal culinary traditions sa pagtapos it Ramadan.
Ro inisyatibo hay resulta it pagbueoligan it Department of Tourism ag iba pang stakeholders agud pabaskugon ro Boracay bilang sangka Muslim-friendly beach destination sa Pilipinas.
Sa nasambit man nga lugar makit-an ro Marhaba Beach, ro mismong nakataeanang Muslim-friendly beach sa nasyon kaibahan ro iba pang mga accommodation establishments.
