Nag-abot sa tatlong katawo ro namatay matapos ro ginadudahan nga outbreak it gina-alegar nga Hantavirus sakay it sangka cruise ship sa Atlantic Ocean, suno sa World Health Organization (WHO).
Ginkumpirma it WHO nga sangka kaso pa eamang ro kumpirmadong namatay, samtang limang iba pa ro gina-imbestigahan.
Nasayuran nga sangka 69-anyos nga British national ro presenteng sa intensive care sa Johannesburg, South Africa.
Ro hantavirus hay kaeabanan nga ginapasa sa tawo halin sa mga eanggam pinaagi sa andang ihi ukon higku ag pwedeng magtuga it grabeng sakit sa pagginhawa. Sa tumaeagsahon nga kahigayunan, pwede man raya nga maipasa halin sa tawo sa tawo.
Suno sa mga awtoridad sa South Africa, ro unang pasyente nga nagpakita it sintomas hay sangka 70-anyos nga eaeaki nga namatay samtang sa barko. Ro anang bangkay hay presenteng sa Saint Helena.
Nagmasakit man ro anang 69-anyos nga asawa ag gindaea sa South Africa, kun sa siin imaw hay namatay sa sangka ospital sa Johannesburg. Base sa report, ro mag-asawa hay natumod nga mga Dutch national.
Ginpahayag dugang nga ro ikatlong namatay hay nagapabilin pa sa barko, samtang gina-istoryahan kon igabutang sa isolation ro daywang iba pang pasyente sa mga ospital sa Cape Verde.
Suno sa WHO, nagabulig raya sa koordinasyon sa tunga it mga nasyon nga eakot sa operator it barko para sa medical evacuation it mga pasyente, kamana man ro pagpatigayon it public health risk assessment ag pagtau it suporta sa mga sakay it barko.
