Ginasueong ni Senador Loren Legarda ro proposed bill nga magadeklara sa Waling-waling (Vanda sanderiana) bilang National Orchid it Pilipinas, bilang tikang agud nga mapabaskog ro konserbasyon ag proteksyon sa sambilog sa mga nagapameligro nga endemic nga tanum sa nasyon.
Sa anang sponsorship speech sa plenaryo it Senado, adlaw it Martes, Mayo 5, ginbalikan ni Legarda ro anang naunang proposisyon ko 2012 nga nagatuyo nga kilaeahon ro Waling-waling bilang dugang nga national flower kaibahan ro Sampaguita. Apang, na-veto ro nasambit nga proposisyon kato.
Ginpamilit it senador nga eabaw pa sa simbolismo ro tuyo it nasambit nga inisyatiba bangud nga ro kaeowasan it orkidyas nga padayun nga nagapameligro tuga it pagka-kalbo it kagueangan, ilegal nga pagputoe it kahoy, pagkaduea it ilistaran, pagbag-o it klima, ag bukon it kontroladong pagbo-oe it mga wild nga tanum para sa komersyal nga gamit.
Ro Waling-waling (Vanda sanderiana), nga nagatubo eamang sa Pilipinas, hay eaban nga nagatubo sa mga kagueangan it Davao, Cotabato, ag Zamboanga, rason nga raya hay importanteng manggad sa aspeto it biological ag kultura.
Sa idaeum it proposed bill, magapanguna ro Department of Environment and Natural Resources (DENR) sa konserbasyon, proteksyon, ag pagpa-abu it nasambit nga species, samtang igasueong man it National Museum of the Philippines ro importansiya it scientific and cultural importance.
Dugang pa nana nga angay ag bagay sa pambansang pagkilaea ro Waling-waling bangud sa pagiging tumaeagsahon kara sa nasyon, kakaibang kanami it bueak ag cultural significance nga nagasimbolo sa natural heritage it nasyon.
