Nagpromisa ro Thailand ag Cambodia nga padayunon ro bukas nga komunikasyon ag magalikaw sa mga tikang nga pwedeng magpa-grabe pa it tensyon matapos ro trilateral meeting nga ginpangunahan it Pilipinas sa sidelines it 48th ASEAN Summit.
Ginpangunahan ni Pangueong Ferdinand Marcos Jr. ro nasambit nga meeting kaibahan sanday Cambodian Prime Minister Hun Manet ag Thai Prime Minister Anutin Charnvirakul, bilang kaparte it papel it Pilipinas bilang ASEAN chair.
Suno kay PBBM, tuyo it pagueong nga magtau it “meaningful space for constructive dialogue” angot sa padayun nga banggi-anay sa border it daywang nasyon.
Sa joint press conference, ginpahayag it Pangueo nga parehong ginkilaea it daywang lider ro importansiya it restraint, dere-deretso nga komunikasyon, ag malinong nga pagresolba sa owa pag-ilintindihan.
Ginhimo ro pagpueong sa tunga it naga-init nga tensyon sa tunga it Thailand ag Cambodia bangud sa mga gina-agawan nga teritoryo maeapit sa Preah Vihear temple ag pilang parte it Gulf of Thailand.
Nagpasaeamat sanday Hun Manet ag Anutin sa Pilipinas sa pag-facilitate it dayalogo.
Samtang, ginpamilit ni Anutin nga importanteng likawan ro banggi-anay it daywang magkaeapitbaeay nga nasyon.
Kadungan kara, ginpahayag man ni PBBM ro pag-extend it mandato it ASEAN Observer Team (AOT) hasta sa Hulyo agud nga padayunon ro pagbantay sa pagpatuman it mga kasugtanan sa tunga it Thailand ag Cambodia.
