Nag-abot sa US$2.87 bilyon ro cash remittances halin sa mga Overseas Filipino Workers (OFWs) ko Marso 2026, suno sa Bangko Sentral ng Pilipinas (BSP).
Raya hay nagtaas it 2.8 porsyento kumpara sa US$8.44 bilyon nga nailista umpisa Enero hasta Marso 2025, nga naging US$8.68 bilyon sa parehong tiempo makaron nga 2026.
Nagapabilin nga nagapangunang ginhalinan it remittances ro Estados Unidos, nga ginsundan it Singapore ag Saudi Arabia.
Ro nasambit nga mga nasyon hay may mabahoe nga numero it mga Pilipinong trabahador sa sektor it ikamayad nga eawas, teknolohiya ag serbisyo.
Samtang, ro personal remittances kaibahan ro cash nga ginapadaea pinaagi sa banko, informal channels, ag remittances in kind hay nag-abot sa US$3.20 bilyon ko Marso 2026.
Sa year-to-date nga listahan, tumaas man raya it 2.8 porsyento halin sa US$9.40 bilyon ko Enero hasta Marso 2025 paagto sa US$9.66 bilyon sa parehong tiempo it 2026.
Importante ro remittances bilang sambilog sa pinakamabahoe nga ginaboe-an it foreign exchange reserves it Pilipinas.
Mabahoe ro bulig kara sa pagbaskog it piso ag sa domestic consumption, bangud nga kaabuan sa mga pamilyang nagabaton it remittances hay ginagamit raya para sa pagkaon, edukasyon, ag pabaeay.
Ro padayun nga pag-umwad it remittances hay nagapakita it resilience it mga OFW sa pihak it pangkalibutanon nga hangkat, apang nagapabilin man nga hangkat para sa nasyon ro pagtukod it bastante nga lokal nga trabaho agud nga indi eubos nga magsalig ro ekonomiya sa padaea halin sa ibang nasyon.
