Dalawang colorum na sasakyan ang na-impound ng Land Transportation Office Region VI (LTO-6) matapos mahuling nagsasakay ng mga pasaherong may bayad nang walang kaukulang prangkisa sa Western Visayas.
Bahagi ito ng “Oplan Biyaheng Ayos: Undas 2026” na sinimulan noong Oktubre 23 upang matiyak ang kaligtasan ng mga biyahero at pagsunod ng mga motorista sa mga regulasyon sa transportasyon.
Noong Oktubre 25, nahuli ang isang pribadong van sa Mohon Terminal sa Arevalo, Iloilo City dahil sa paghahatid ng mga turistang may bayad nang walang balidong prangkisa. Noong Oktubre 24 naman, nasita ang isang multi-purpose vehicle o MPV sa Barangay Batuan, Pototan, Iloilo habang naghahatid ng mga pasaherong nagbayad ng ₱2,000 para sa biyahe mula Lambunao patungong Pototan.
Sa isinagawang inspeksiyon, mahigit 700 sasakyan ang nasuri, 31 Temporary Operator’s Permits ang inilabas, at limang hindi rehistradong sasakyan ang nasita, bukod sa mga sasakyang may depektibong piyesa o aksesorya.
Ayon sa LTO-6, nagpapatuloy ang kanilang pagbabantay sa mga terminal at pangunahing ruta. Mahigit 200 colorum na sasakyan na rin ang nahuli ng ahensiya sa rehiyon mula Enero, kabilang ang mga motorsiklo, traysikel, taxi, sedan, van at MPV.
Source: LTO-6 Digital
