Ginhinyu it abogado ni dating Pangueong Rodrigo Duterte sa International Criminal Court (ICC) Trial Chamber III nga uman nga ipaidaeum sa medical examination ro 81-anyos nga dating pangueo agud nga matumod kun masarangan pa nana nga mag-atubang sa pagbista angot sa anang kasong crimes against humanity.
Sa sangka pitong-pahina nga pleading nga may petsang Mayo 25, ginpahayag it defense counsel nga si Peter Haynes nga ro naunang medical assessment hay ginpatigayon pa eamang sa pre-trial stage, rason nga kinahangean nga uman nga mausisa ro kahimtangan it dating pangueo samtang nagahilapit ro pormal nga pagbista.
Ginpamilit it depensa nga ro korte hay may obligasyong uman nga usisaon ro fitness to stand trial kada 120 diyas ukon kon may hinyu ro anuman nga parte agud nga masiguro ro kinamatarung it akusado sa sangka makatarungang proseso.
Ginpamilit pa ni Haynes nga pwedeng imandu it korte ro panibag-ong medical, psychiatric, ukon psychological evaluation base sa Rules it ICC.
Sa sangka naunang status conference ko Mayo 27, ginpahayag ni ICC Trial Chamber III Presiding Judge Joanna Korner nga igamandu it korte ro uman nga pag-examine sa kahimtangan ni Duterte bago mag-umpisa ro trial.
Suno sa korte, pwedeng gamiton it uman ro mga naunang eksperto nga nagpatigayon it pag-usisa sa dating pangueo ukon magtaeana it bag-ong panel it mga medical expert, depende sa magiging desisyon it korte.
