Makapareha it Filipino tennis star nga si Alex Eala ro tennis legend nga si Venus Williams sa doubles draw it Bad Homburg Open, base sa report it Tennis Channel.
Kaibahan man nanday Eala ag Williams ro German player nga si Eva Lys nga nataw-an it main draw wildcard sa singles competition it WTA 500 tournament nga pagahiwaton sa Bad Homburg, Germany.
Para sa 20-anyos nga si Eala, sangka tumaeagsahon nga kahigayunan nga maka-ibahan sa sangka koponan si Williams, sangka pitong beses nga Grand Slam singles champion ag ginakabig nga sambilog sa mga pinakadominanteng player sa kasaysayan it tennis.
Raya hay bukon it unang beses nga maka-atubang ni Eala ro pamilya Williams sa court. Ko Enero, ginpiyerde nanday Eala ag Iva Jovic ro tambalan nanday Venus Williams ag Elina Svitolina sa Round of 16 it ASB Classic.
Samtang, temprano nga nagtapos ro kampanya nanday Alex Eala ag partner kara nga si Nikola Bartunkova sa WTA 125 Birmingham Open doubles.
Naangkon it duo ro three-set defeat kontra kanday Harriet Dart ag Maia Lumsden it Great Britain, 6-4, 2-6, 11-9.
Bangud kara, magatutok eon lang ro Filipina tennis ace sa singles competition it nasambit nga sporting event.
Nakataeana nana nga paga-atubangon si Priscilla Hon it Australia sa Round of 32.
