Baton it Pilipinas ro naging resulta it United Nations Security Council election ag nagpaabot it pagtamyaw sa Kyrgyzstan sa pagdaog kara ag naangkon ro non-permanent seat para sa 2027–2028 term.
Napas-eawan ro PIlipinas nga maangkon ro non-permanent seat para sa 2027-2028 term matapos nga mabo-oe it Kyrgyzstan ro puwesto pinaagi sa 49-142 vote kontra sa Pilipinas.
Naangkon it Kyrgyzstan ro naga-isaeahanon nga seat nga nakatigana para sa Asia-Pacific regional group, kun sa siin magaserbi sa Council sa kauna-unahang kahigayunan.
Sa pihak it kapas-eawan nga maangkon it Pilipinas ro UNSC seat, ginpahayag ni Foreign Affairs Secretary Ma. Theresa Lazaro nga ro Pilipinas hay nagapabilin nga committed nga makipag-bueuligan sa tanan nga mga nasyon nga nagasueong it kalinong, stability, sustainable development, ag rules-based international order.
Base sa report, sa UNSC election nga ginpatigayon adlaw it Miyerkules, napas-eawan nga mabo-oe it Pilipinas ro kinahangeanon nga two-thirds majority, ukon 128 boto halin sa 191 UN members present sa UN General Assembly sa New York City.
Bago pa ro pinal nga paghuyap, nagpatigayon ro UNGA it tatlong dugang nga rounds it botohan matapos nga makabo-oe eamang it 85 votes ro Pilipinas ag 105 man para sa Kyrgyzstan para sa first cycle.
Ro UNSC hay ginaeakipan it 15 member-states, kaibahan ro Tsina, France, Russia, United Kingdom, ag Estados Unidos hay nagsirbi bilang permanent members. Sa idaeum it UN Charter, ro tanan nga member-states hay obligadong magsunod sa desisyon it Konseho.
