Nag-abot sa 22 nga katawo, kaibahan ro 12 nga dumueuong ro namatay sa sunog nga nag-eontad sa sangka hotel sa Malviya Nagar, South Delhi, adlaw it Miyerkules.
Suno sa mga awtoridad, raya hay sambilog sa pinaka-grabeng insidente it sunog sa kabisera it India umpisa ko 2022.
Owa pa ginpaguwa it mga awtoridad ro pagkatawo it mga dumueuong nga biktima, apang gin-report it lokal nga media nga may mga halin sigon sa Bangladesh, Nigeria, Mozambique ag Liberia.
Base sa mga saksi, pilang tawo ro napilitang mag-eumpat halin sa nagakasunog nga building agud nga maka-eowas. Insigida man nga nagplastar it mga kutson sa karsada ro mga residente agud nga mabawasan ro kahalitan sa mga naga-eumpat.
Suno sa mga rescuer, nag-umpisa ro kaeayo sa ground floor it ap-at nga panaeagan it edipisyo rason nga na-trap ro mga sa ibabaw nga parte kara.
Nag-umpisa ro sunog bago mag-alas-9 it agahon ag insigida man nga rumesponde ro waeong fire trucks. Eubusan nga natapna ro sunog pag-abot it udtro adlaw.
Kabilugan nga 49 nga katawo ro gindaea sa mga ospital samtang waeong iba pa ro naninahan nga insigida man nga nakaguwa matapos nga mabueong.
Pagduda it mga imbestigador, posibleng naghalin ro sunog sa sangka restaurant nga makit-an sa ground floor it edipisyo.
Naaresto eon man ro tag-ana it building nga si Lavkesh Bajaj samtang nagapadayun ro imbestigasyon sa insidente.
Nagpaabot man it pakikisimpatiya si Indian Prime Minister Narendra Modi sa mga pamilya it mga namatay ag ginpasiguro ro bulig para sa mga apektado.
