Sangka tumaeagsahon ag emosyonal nga pamaagi ro nausoy it sangka permanent makeup artist halin sa UK agud nga magapabilin nga maeapit sa anang namatay nga alagang ayam ag raya hay pinaagi sa anang paghalo it abo kara sa tinta it anang semi-permanent eyeliner.
Matapos ro 20 anyos nga pag-iba, grabe ro kasubo ni Claire Hobson sa pagkaduea it anang palangga nga ayam nga si Patch. Kat magpahaum imaw agud nga magsaylo sa Dubai, nag-aeang-aeang imaw kon aywan ukon ibutang sa maleta ro abo it anang alaga.
Bangud kara, naisipan nana nga kon nahimo it iba nga ihali ro abo it andang mga mahae sa kabuhi sa mga tattoo sa eawas hay pwede man nana raya nga obrahon sa anang eyeliner tattoo agud nga “makita gihapon it anang ayam ro kalibutan pinaagi sa anang mga mata.”
Maskin nga gin-aku ni Claire nga medyu “weird” ro anang ideya, ginbuligan imaw it sangka kapareho nga makeup artist nga naka-eksperyensiya man it kasubo sa pagkamatay it alagang sapat. Madahan nanda nga ginhalo ro sangkiri nga abo ni Patch sa ink bago raya gin-tattoo sa lash line ukon idaeum it anang mga mata.
Suno kay Claire, ro pagpalangga it ayam ro pinakawagas nga klase it paghigugma bangud sa andang katamparan sa sueod it daywang dekada.
Bangud nga semi-permanent eamang ro eyeliner tattoo ag nagakapaea sa pagtaliwan it pilang dinag-on, nagpabilin pa si Claire it bastante nga abo para uman nga magamit sa mga masunod nga touch-up agud nga masiguro nga makaibahan nana si Patch sa mahabang paniempo.
