Nagpahayag it pagkadismaya si NAPOCACIA President German Baltazar sa nagtuhaw nga pag-demolish it andang panimaeay Brgy. Nalook, Kalibo, kahapon adlaw it Myerkules, Hunyo 17.
Suno kana, dag-on 2024 pa raya nga gin-istoryahan ag uwa man sanda nag-pamaeabag sa plano it gobyerno, apang dapat sigon nga sundon tanan ro gin-istoryahan.
Base sa andang gin-istoryahan, pagabayaran sanda ag pagahalinon sa housing unit it lokal nga gobyerno it Kalibo. Apang hasta sa makaron hay uwa it natuman sa andang mga ginistoryahan
Dugang pa kara, ginapilit sigon sanda nga paistaron makaron sa housing unit apang raya sigon hay uwa man it klaro nga resolusyon sa pihak nga apurbado eon ro Resettlement Action Plan ukon RAP.
Uwa man sigon sanda it kasiguraduhan kun raya hay may suplay it tubi ukon kuryente bangud nga uwa man kanda raya gin-turn over.
Paathag ni Baltazar, dapat una nga gin-turn over kanda ro pabahay bago nga mag sueod ro sheriff.
Suno pa kana, naghinyo man sanda it 1 week nga extension sa mismong sheriff para sanda eon lang ro maga-demolish sa andang kaugalingon nga baeay, apang uwa raya ginpasugtan.
Panawagan nana sa lokal nga gobyerno it Kalibo nga atubadngon ro andang problema ag magpatawag it meeting bangud nga abo sandang dapat nga istoryahan.
