Padayun ro pagnaba it presyo it langis sa world market sa ikaywang adlaw it trading matapos ro paghaeambaeang pangkalinungan sa tunga it Estados Unidos ag Iran, nga nagbukas it posibilidad it panibag-ong rollback sa presyo it produktong petrolyo.
Base sa monitoring it industriya, nagapabilin nga panaba ro presyo it tanan nga produktong petrolyo, kun sa siin ginaeauman nga maganaba it P9 kada litro ro diesel, P5.50 kada litro ro gasolina, ag P10 kada litro ro kerosene.
Bumagsak man it masobra sa 10 porsiyento ro presyo it krudo makaron nga domingo bangud sa optimismo nga makaangkon it pangmabuhayan nga kasugtanan ro Washington ag Tehran matapos ro masobra sa tatlong buean nga banggi-anay nga nagtuga it pagkabaeaka sa energy markets ag uman nga pagtuhaw it inflation concerns.
Mas pang nagbaskog ro pagnaba it presyo matapos magguwa ro report nga pwedeng haeugaan it Estados Unidos ro sanctions kontra sa Iranian crude bilang kaparte it peace deal, nga magatau it daean sa Iran agud nga uman nga makabaligya it krudo ag refined petroleum products sa world market.
Nakatutok makaron ro merkado sa pormal nga pagpirma it kasugtanan sa Switzerland sa Biyernes ag sa masunod nga mga negosasyon angot sa nuclear program it Iran ag pagbo-oe it international economic sanctions.
Nauna eon nga ginpahayag ni US President Donald Trump nga magiging “completely open” ro Strait of Hormuz, sambilog sa pinaka-importanteng ruta nga gina-agyan it langis sa bilog nga kalibutan sa oras nga eubusan nga mataw-an it katumanan ro kasugtanan.
Posible pa sigon nga mag-dere-deretso ro pagnaba it presyo it langis kun madayun ro pagpirma sa peace agreement.
