Nakaslista it pagnaba sa tourist arrival sa Isla it Boracay ro Malay-Boracay tourism office para sa katunga nga buean it Hunyo.
Suno kay Katherine Licerio, tagapaghambae it nasambit nga taeatapan, nakarekord it kabilugang 93,739 nga tourist arrival para sa katunga it buean kun sa siin masobra 7,000 kara hay foreign tourist, 84,784 sa domestic, ag 1,338 mat-a ro mga OFWs. Mas manaba raya it 17% kaysa sa rekord nga nalista sa parehong tyempo ku nagtaliwan nga dag-on.
Posible sigon nga nakaapekto sa pagnaba ro padayon nga pagnaba it foreign tourist, nga nag-umpisa halin pa ku katapusan it pandemya.
Dugang pa kara, posibleng rason man ro pag tapos it summer season ag pagbalik sa eskwelahan it mga estudyante.
Pahayag ni Licerio nga ginakabig eon nga mahinay ro buean it Hunyo pag-abot sa turismo sa isla. Mabahoe sigon ro magiging epekto kara sa ekonomiya it isla bangud nga nakadepende raya sa tourism industry. Apang, ginpasiguro man nana nga padayon ro andang pagtinguha nga i-promote ag pag-himo it mga tikang para nga mapabilin ukon mas mapbaskog pa ro turismo sa isla.
Samtang, ginpahayag ni Licerio nga uwa nadayon ro pag-abot it sangka cruise ship, nga maga-tinir kunta it daywang adlaw sa isla, makaron nga buean it Hunyo tuga it paiba-ibang kondisyon it panyempo.
Apang ginpasiguro man nana nga may ginaeauman pang ap-at nga cruise ship nga maga-abot antes matapos ro dag-on.
