Bukon eon it bag-o ro bullying sa nasyon. Raya ro naging pahayag ni Prof. Ramon Beleno III, sangka political analyst.
Suno kana, naa-bag’o eamang raya base eon man sa nagiging hueag it kada henerasyon.
Sa presenteng henerasyon, madja malisod nga masayran ro hueag ukon pag-iisip it mga kabataan bangud nga mas maabo pa ro andang nagugol nga oras sa andang mga gadget kaysa nga makipag-salamuha sa mga tawo sa andang palibot.
Dugang pa nana, ro bullying hay sambilog eamang sa mga posibleng rason it mga naga-taas nga karahasan ag suicidal rate sa mga kabataan. Bangud kara, dapat raya ro taw-an it atensyon para nga matapna ukon mapunggan ro kaeainan nga pwedeng maisip it mga kabataan.
Importante man sigon ro presesnya it ginikanan bangud nga posibleng nagakueang ro presenteng henerasyon it outlet ukon mapaguw-an it andang mga baeatyagon.
Paathag pa ni Prof. Beleno, bukon it raya ro tamang oras nga magbaeasuean ro kada isaea, kundi raya ro tamang oras para nga magbueuligan nga maipatuman it mayad ro laye.
Indi dapat sigon nga isalig sa sangka sektor eamang ro pagprotekta ag pag-giya sa mga kabataan bangud nga tama ro haeambaeon nga “It takes a village to raise a child”.
Panindugan man nana nga may rason kun haman ginhimo ro Juvenile Justice Law. Para kana, bulok man nga ieakot ukon ikulong ro mga kabataan kaibahan ro minatuod nga kriminal bangud nga bukon sigon it rason ro sangka saea nga desisyon para nga tumuron sanda bilang mga minatuod nga kriminal.
Dapat sigon nga ipaidaeom sanda sa restorative justice para sa andang posibleng pag-tuon halin sa andang mga naging saea.
