Gibatikos ni House prosecution panel spokesperson Zia Alonto Adiong ro depensa ni VP Sara Duterte sa anang sabat sa Articles of Impeachment, ag gintawag rayang “pauman-uman” ag nakapokus eamang sa mga teknikal nga istorya.
Sa 51 pages nga sabat, ginpunto it bise presidente nga uwa it bisa ro impeachment proceedings bangud ginpatigayon sigon raya nga may gina-apinan ag “bad faith.”
Gindepensahan man nana ro anang kaugalingon kontra sa mga alegasyon it misuse it confidential funds, unexplained wealth, ag grave threats, kaibahan ro paghambae nga bukon pa it pinal ro mga Notice of Disallowance ng Commission on Audit ag legal nga gntaeana ro mga pondong gin-istoryahan.
Ginpamalibaran man it Bise Presidente ro alegasyon it pagpanuhoe sa mga opisyal it DepEd ag ginhambae nga uwa imaw it intensyong manakit sa anang mga naging pahayag nga may kaangtanan kandat Pangueong Ferdinand Marcos Jr., First Lady Liza Araneta-Marcos, ag dating House speaker Martin Romualdez.
Apang, ginhambae ni Adiong nga ginapakita eamang it mga depensa ngara ro kakueangan it mapag-on nga kontra-ebidensya it kampo ni Duterte ag ginpunto nga bukon absolute ro kahilwayan sa pagpahayag, eabi eon kun may paeag sa Pangueo.
