Nagapati ro grupong Alyansa ng Bantay sa Kapayapaan at Demokrasya ukon ABKD nga dapat magpangibabaw sa gihapon ro tamang pagpatuman ukon due process it laye para masayuran kun may saea ukon owa ro kada Pilipinong gina-akusahan.
Suno kay ABKD Chairman Emeritus Dr. Jose Antonio Goitia, ro isyu hay mas pa sa pulitika ukon relihiyon kun sa siin raya hay sangka pag-testing kun ro mga kinamatarung nga Konstitusyonal hay ginagamit nga may saeabton ag pag-respeto sa laye.
Dugang pa ni Goitia, ginarespeto nana ro mga igmanghud sa Iglesia ni Cristo sa pagpatigayon it rally apang kabay nga indi sanda magpagamit sa mga oportunistang pulitiko ukon sin-o mang nagapamentaha sa pagtu-o para sa pangkaugalingon ukon pampulitikang interes.
Importante man sigon nga magsunod ro kada isaea sa mga patakaran sa pagpatigayon it rally kapareho it pagbo-oe it permit eabi pa ag nagatau raya it daean sa maayos nga koordinasyon, seguridad, ag pagdumaea sa trapiko agud nga maprotektahan ro kamaeayran it kaabuan.
Uman nga nagpadumdum si Goitia nga ro pinakamabahoe nga away hay bukon it away sa kada isaea bangud nga ro matuod nga kaaway hay ro korapsyon, pagpang-abuso sa gahum, kapigaduhon, kriminalidad, ag tanan nga mga nagapahina sa mga institusyon ag nagasamad sa kumpiyansa it publiko.
