Indi maganaba sa 14 nga mga unga ro namatay samtang limang iba pa ro naninahan matapos mahugos ro bungbungan it sangka tutoring center sa siyudad it Lahore, sa nasidlangan nga parte it Pakistan.
Ginkumpirma it mga opisyal it siyudad ro numero it mga namatay ag ginpahayag nga sangka manugturo ro naninahan.
Nasayuran nga naga-edad it 4 hasta 12 anyos ro mga biktimang namatay. Padayun man nga ginabueong sa ospital ro mga naninahan.
Daywang katawo ro gin-aresto it mga awtoridad angot sa insidente. Padayun man ro pagtipon it ebidensya sa gin-eontaran it trahedya.
Nagpahayag man it pakikisimpatiya si Pakistan Prime Minister Shehbaz Sharif sa pamilya it mga biktima ag nagmandu it insigidang pagtau it bulig medikal sa mga naninahan.
Suno pa sa opisyal nga ginapatuman nanda ro “transparent, unbiased and immediate investigation” agud nga matumod ro mga responsable sa makangieidlis nga insidente.
Nasayuran nga ordinaryo eon ro pagkahugos it mga building sa Pakistan bangud sa mahinang safety standards ag substandard nga mga materyales. Ko nagtaliwan nga dag-on, 27 nga katawo man ro namatay matapos bumagsak ro sangks building sa Karachi, Pakistan.
