Nagpaandam ro United Nations (UN) nga posibleng mag-abot sa $3.6 billion ro magiging epekto it presenteng Ebola outbreak sa ekonomiya it Africa ag magtuga it pagkaduea it masobra sa 328,000 trabaho kun indi eabi mapugngan ro pagkalhit it sakit.
Suno sa UN, ro pagkalhit it ‘Bundibugyo strain’ it Ebola nga owa pa it aprubadong bakuna hay posibleng magresulta sa sangka maeapnagon nga krisis.
Sa record it gobyerno it Democratic Republic of Congo, naga-abot eon sa 1,307 nga katawo ro natapnan it sakit ag 377 ro namatay umpisa nga gindeklara ro outbreak ko Mayo 15.
May nailista man nga pilang kaso sa Uganda, samtang nagpaandam ro mga eksperto nga posible pang magkalhit ro virus sa mga kaiping nga nasyon kapareho it South Sudan.
Suno kay Damien Mama, resident representative it United Nations Development Programme (UNDP) sa Congo, pwede pang makontrol ro outbreak kun insigidang maitau ro kinahangeanon nga suporta ag pondo.
Sa pihak kara, ginpahayag nana nga kun mapas-eawan ro mga nasyon nga mapugngan ro pagkalhit it sakit, posibleng magaresulta ro health emergency sa mas madaeum ag pangmabuhayan nga krisis sa pag-umwad it rehiyon ag maskin sa bilog nga Africa.
Base sa tatlong senaryong ginplastar it UNDP, ginaboeobanta nga naga-abot sa $1 billion ro magiging kahalitan sa gross domestic product (GDP) it Congo kun magapabilin nga kontrolado ro outbreak sa Congo ag Uganda.
Sa pinakamaeain nga sitwasyon, kun magakalhit ro Ebola sa iba pang mga nasyon kapareho it Rwanda ag Angola ag magadungan sa pagtaas it presyo it langis tuga it krisis sa Iran, posibleng mag-abot sa $3.6 billion ro maduea sa ekonomiya it Africa ag ginatos kalibo nga trabaho ro maduea.
