Haeos nag-abot eon sa 2,025 nga katawo ro namatay sa France tuga it naeksperyensiyahan nga heatwave sa Europa umpisa ko ulihing domingo it Hunyo suno sa public health officials.
Nasayuran nga 30 porsiyento raya nga mas mataas kumpara sa nagtaliwan nga domingo. Suno man kay French Health Minister Stéphanie Rist, kaeabanan sa mga namatay hay naga-edad it 45 pataas.
Nasayuran nga ko Hunyo 24, nailista it France ro pinakamainit nga adlaw sa kasaysayan it nasyon, kun sa siin, nag-abot sa haeos 41 degrees Celsius ro temperatura sa Paris samtang ginapaidaeum sa red heat alert ro katunga it nasyon.
Ginaeauman nga uman nga maga-abot sa 40 degrees Celsius ro temperatura sa nabagatnan nga parte it France, samtang nagpaguwa ro gobyerno it red alert status bangud sa paeag it forest fires.
Base sa datos, 7,000 nga sunog eon ro nailista umpisa nga mag-eontad ro tag-init, nga nagpa-ugdaw sa masobra sa 8,700 ektarya it eugta sa nasyon. Libu-libong residente man ro ginbakwit matapos ro pagkalhit it widfire.
Samtang, nag-abot sa 1,222 ro mga nailistang excess deaths sa Belgium, 39 porsiyentong mas mataaas. Haeos katunga it mga namatay hay naga-edad it 85 pataas.
Sa Netherlands man, gin-report it mga awtoridad ro ginaboeobanta nga 480 excess deaths ko nagtaliwan nga domingo nga kaabuan hay mga senior citizen nga naga-edad 80 pataas, matapos umabot sa haeos 40 degrees Celsius ro temperatura sa pilang parte it nasyon.
Suno sa Copernicus Climate Change Service, ro Europa ro pinakamadasig nga mag-init sa tanan nga kontinente ag naga-init it daywang beses nga mas madasig kaysa sa pangkalibutanon nga average.
Bangud kara, mas sigidas nga maeksperyensiyahan ro grabeng heatwave, kakueangan sa suplay it tubig, ag wildfire.
