Mataeupangdan ro pag-inabu it mga secondhand nga breast implant nga ginabaligya sa mga online classified ad platform sa Russia.
Suno sa mga plastic surgeon, amat-amat eon nga naganaba ro popularidad it breast augmentation sa nasambit nga nasyon ag bumagsak raya sa haeos 40 porsiyento sa nagtaliwan nga dekada. Apang ro eubus nga nagpakibot sa publiko kan-o eamang hay ro pagdagsa it mga nagabaligya it mga ginpabo-oe nga silicone implant.
Pila sa mga ginatau nga rason it mga kababayen-an sa pagpabo-oe kara hay bangud nga nag-unga eon, natak-an eon sa pag-angkon it mabahoe nga dughan ukon nakabatyag it sakit sa eawas. Apang, ro hinyu nga mabawi ro ginastos sa operasyon ro nagtueod sa pila nga ibaligya ro mga raya.
Suno sa mga eksperto, ro tumaeagsahon ngara nga kalakaran hay posibleng may kaangtanan sa naeksperyensiyahan nga krisis sa ekonomiya it Russia. Bangud sa pagnaba it balor it kwarta ag paghalin it mga mabahoe nga international companies idtu, napilitan ro pila nga ibaligya ro andang mga propiyedad agud nga makatibawas kaibahan eon ro mga residente halin sa mga manggaranon nga lugar kapareho it St. Petersburg ag Moscow.
Ginabaligya ro mga maeahaeon nga implant it mas barato kaysa sa orihinal nga presyo kara. Halimbawa, ro sangka Mentor implant nga nagabalor kato it masobra sa 140,405.52 Russian Ruble ukon 112,000 pesos hay mabakae eon lang makaron sa balor nga 35,101.38 Russian Ruble ukon 28,000 pesos.
Sa pihak kara, nagpaandam ro mga eksperto nga owa it doktor ro magapasugot nga gumamit it secondhand silicone implant. Imposible raya nga malimpyuhan it maayos bangud nga nagapabilin kara ro biomaterial it unang tag-ana. Ro paggamit kara hay posibleng magtuga it tissue necrosis ukon pagkamatay it mga tissue ag pwede pang mauli sa kamatayon bangud nga siguradong iga-reject raya it immune system it bag-ong maga-gamit.
