Gin-uyog it magnitude 7.4 nga linog ro baybayon it estado it Chiapas sa Mexico, rason nga nagpaguwa it tsunami warning ro mga awtoridad ag nabatyagan ro pag-uyog sa Guatemala ag El Salvador.
Suno sa United States Geological Survey (USGS), tumama ro linog maeapit sa banwa it Puerto Madero nga may kadaeumon nga masobra sa 10 kilometro.
Kasunod it pag-uyog, nagpaguwa ro U.S. Tsunami Warning System it paandam nga posibleng makaangkon it tsunami waves sa mga baybayong sa sueod it 300 kilometro halin sa epicenter it linog.
Sa Guatemala City, napabalita nga mabaskog nga nabatyagan ro linog rason nga madaling nagbakwit ro pilang residente paguwa it andang mga baeay.
Suno sa report, nagpatigayon man it evacuation ro mga empleyado sa sangka edipisyo it gobyerno bilang kaparte it ginapatuman nga safety protocols.
Nabatyagan man ro pag-uyog sa El Salvador nga may katamtamang kabaskog sa kabisera it andang estado, apang owa pa it nailistang mabahoe nga kahalitan ukon namatay.
Padayun man nga gina-monitor it mga awtoridad ro sitwasyon samtang ginapatigayon ro assessment sa mga posibleng epekto it linog.
