Ginbasura it South Korea police ro reklamong ginpasaka kontra sa aktor nga si Kim Soo Hyun angot sa alegasyong nakipagrelasyon sigon imaw sa namatay nga aktres nga si Kim Sae Ron kat menor de edad pa raya.
Base sa report it Yonhap News Agency, nagdesisyon ro Seoul Seongdong Police Station nga indi eon pagpadayunon ro kaso bangud sa kakueangan it ebidensya.
Nag-umpisa ro isyu matapos akusahan it pamilya ni Kim Sae Ron ro aktor nga nakipagrelasyon sigon sa aktres samtang raya hay menor de edad pa.
Nagguwa pa ro kontrobersiya matapos magtuhaw ro mga alegasyon sa YouTube channel nga HoverLab Inc. kontra kay Kim Soo Hyun.
Ko Abril 2025, nagpasaka man it civil lawsuit ro aktor kontra sa pamilya ni Kim Sae Ron ag sa mga operator it nasambit nga YouTube channel.
Hugut nga ginpamalibaran ni Kim Soo Hyun ro mga akusasyon kontra kana. Suno kana nga nakaangkon sanda it relasyon ni Kim Sae Ron sa sueod it haeos sang dag-on, apang natabu raya kat pareho eon sanda nga una sa tamang edad.
Ginpamalibaran man it aktor ro mga pahayag nga may kahilabtanan sigon imaw sa pagkamatay it aktres.
Nagtaliwan si Kim Sae Ron ko Pebrero 2025 sa edad nga 24.
Nakilaea imaw sa mga pelikulang ”A Brand New Life” ag ”The Man From Nowhere”, kamana man sa mga seryeng ”Hi! School Love On”, Can You ”Hear My Heart”, ag ”The Queen’s Classroom.”
Samtang, si Kim Soo Hyun hay sambilog sa pinaka-kilaeang South Korean actors, nga sumikat sa mga hit drama nga ”Queen of Tears,” ”It’s Okay to Not Be Okay,” ag ”My Love from the Star.”
