Ginpahayag ni Army Col. Raymund Dante Lachica nga haum imaw nga maghambae it kamatuoran kon pagapatawgon agud nga magtestigo sa impeachment trial ni Vice President Sara Duterte angot sa alegasyon nga saea nga paggamit it confidential funds.
Sa pahayag nga ginpaguwa pinaagi sa Office of the Vice President, ginpahayag ni Lachica nga maskin kan-o hay owa imaw nagpamalibad nga mag-atubang ukon magtestigo ag haum imaw nga tumestigo kun legal nga pagapatawgon, sandig sa mga ginapatuman nga laye ag security restrictions.
Pauman-uman nga namitlang ro pangaean ni Lachica sa testimonya ni dating OVP special disbursing officer Gina Acosta. Suno kay Acosta, gintau nana kay Lachica ro P125 milyon nga confidential funds ko Disyembre 2022, matapos sigon imaw nga sugu-on mismo ni Duterte.
Sa pihak kara, owa pa nakadesisyon ro House prosecution team kun pagapatawgon si Lachica bilang hostile witness. Suno sa mga prosecutor, kinahangean nanda nga maging madahan bangud indi nanda makontrol kun ano ro pagahambaeon it sangka hostile witness sa stand.
Nauna eon nga ginpamalibaran ni Lachica ro alegasyon ni Ramil Madriaga, nga naghambae nga nagsirbi imaw nga “bagman” ni Duterte ag nakipagbueuligan kay Lachica sa paghatud it mga bag it kwarta. Gin-kwestiyon man ni Lachica ro kredibilidad ni Madriaga ag ginpamalibaran nana nga nakilaea ukon nakatrabaho raya sa OVP.
Samtang, ginpahayag it Armed Forces of the Philippines nga gintapos eon nanda ro separado nga imbestigasyon kay Lachica agud nga malikawan ro pagdoble sa imbestigasyon it Office of the Ombudsman.
Nagpanawagan man si Bicol Saro Rep. Terry Ridon sa Ombudsman nga imbestigahan sanday Lachica, Duterte ag Acosta angot sa posibleng saeabton sa paggamit it masobra sa P500 milyon nga OVP confidential funds ko 2022 ag 2023.
Naka-“unassigned” status si Lachica sa Philippine Army headquarters umpisa Oktubre 4, 2025, matapos imaw nga boe-on bilang pinuno it Vice Presidential Security and Protection Group. Suno sa AFP, ginpasiguro it status ngara nga pwede imaw nga maging available kun kinahangeanon sa anumang imbestigasyon ukon angot sa pagbista.
