Hugot nga ginsaway it defense team ni Vice President Sara Duterte ro paggamit it prosekusyon it mga bukon it angay nga tinaga sa nagapadayon nga impeachment trial sa Senado.
Sa ika-18 nga adlaw it pagdinig, gin-untat ni Defense Counsel Atty. Kristine Ferrer ro pagpangutana ni Prosecution Counsel Atty. Mae Divinagracia sa testigong si OVP Assistant Chief of Staff Lemuel Ortonio.
Partikular nga ginsaway it depensa ro paggamit it mga tinaga nga “mastermind” ag “architect” sa pagpakita kay Vice President Duterte nga may kaangtanan sa paggamit it confidential funds.
Ginpangabay it depensa nga paeson ukon paeaon sa opisyal nga rekord it korte ro nasambit nga mga pahayag.
Ginpangabay man it defense team sa Impeachment Court nga paandaman ag pahalinon sa prosekusyon ro paggamit it mga bukon it angay nga tinaga pareho it “scam” ag iba pang mabug-at nga alegasyon, agud malikawan ro pre-judgment ag mind-conditioning samtang nagapadayon ro hearing.
Ginsugtan man ni Presiding Officer ag Senate President Francis “Chiz” Escudero ro mosyon it depensa.
Ginmanduhan nana ro prosekusyon nga maggamit it mas angay ag kabaton-baton nga mga tinaga, samtang ginpuna nga madya nagapadayon eon raya nga gawi it prosecution panel.
Samtang, uwa anay nagkomento ro tagapagsayod it defense team nga si Atty. Michael Poa kon gintuyo gid it prosekusyon ro paggamit it mga nasambit nga tinaga.
Suno kay Poa, may kanya-kanyang estratehiya ro mga abogado sa depensa ag prosekusyon sa pagtuman it anda mga katungdanan sa korte, pero naga-eaum sanda nga magapabilin nga maayos ag angay ro mga tinaga nga gamiton sa masunod nga mga hearing.
