KALIBO, Aklan—Ginpanugyan ni Atty. Plaridel Morania, sangka batikan nga abogado sa Aklan ag dating professor sa mga manugturo nga bilang sambilog man sa mga baganihan nga nagatao it kaaeam sa mga inonga, dapat ipaathag kanda ro naging kontribusyon it mga baganihan nga nagbuwis it kabuhi para sa kahilwayan it nasyon kapin eon makaron nga kumpleto sa teknolohiya ro kalibutan.
Raya hay kasunod it ginadumdom makaron ro National Heroes Day nga gindeklara bilang regular holiday sa bilog nga nasyon.
Ginpahayag ni Atty. Morania nga ro istorya it atong nasyon, hay istorya man it atong mga baganihan.
Pinaagi sa andang mga hinimuan, personal nga mga sakripisyo, ag andang mga dugo, andang ginsueat sa mga pahina sa libro it atong nasyon ro andang mga kontribusyon.
Nasayuran nga ro National Heroes Day hay gina selebrar dati kada Nobyembre 30 kada dag-on.
Sa ngaean nga raya nga petsa hay kaadlawan ni Andres Bonifacio, ro Ama it Katipunan hay gin umpisahan man ro tradition sa pagtao it pasidungog sa mga baganihan it nasyon ni Presidente Emilio F. Aguinaldo pina-agi sa pag himo it decree ku Disyembre 20, 1898 nga naga deklara sa kada Disyembre 30 it dag-on bilang “Memorial Day” para pasidunggan si Dr. Jose Rizal ag tanan nga mga Pilipino nga naging martyr para sa kahilwayan it Pilipinas.
