PONTIANAK, Indonesia — Padayun nga nakaka-eksperyensiya it maeapnagon nga sunog ro parte it Indonesian Borneo, nga nagatuga it madamoe ag peligroso nga haze ukon asu nga naka-abot eon hasta sa Malaysia.
Gina-angot ro pag-grabe it mga wildfire sa grabeng tigmaeaea nga tuga it El Niño, nga nagapameligro sa suplay it malimpyo nga hangin ag tubi ag maging sa pag-eskwela it ginatos kalibo nga estudyante.
Sa West Kalimantan, pilang gatos nga eskwelahan ro temporaryong ginsarado bangud sa polusyon sa hangin, butang nga kapin sa 200,000 nga estudyante ro ginpadayun ro andang pagtuon sa andang baeay. Sa pihak kara, nabudlayan ro pilang mga estudyante bangud sa kawad-an it stable nga internet, computer ag kuryente.
Samtang, ginpahayag it health authorities sa Kubu Raya nga masobra sa 1,400 katawo eon ro ginabueong ukon naospital bangud sa acute respiratory infections makaron nga buean it Setyembre. Ko Agosto, umabot man sa 6,396 ro nasambit nga mga kaso. Nagpanupod eon man ro mga awtoridad it ginaboeobanta nga 1,000 face masks kada adlaw, apang naga-umpisa eon nga nagaka-ubos ro andang suplay.
Mag-eowas sa respiratory illnesses, gin-report man ro 225 nga kaso it diarrhea makaron nga buean bangud sa nabawasang access sa malmpyo nga tubi tuga it tigmaeaea.
Sa mga komunidad nga direktang ginatamaan it sunog, nagaeaum ro mga volunteer firefighter sa limitadong kagamitan kapareho it water pumps, hose ag balde. Suno sa sangka community leader, kinahangean pa nanda it dugang nga hose, pagkaon ag protective gear agud nga suk-ean ro mga sunog sa peatland.
Padayun man nga nagapangamuyo ro mga residente nga makaangkon it uean agud nga mapahagan-hagan ro haze ag mapatay ro mga sunog. Kaeabanan nga naga-umpisa ro wet season sa West Kalimantan pag-abot it Oktubre ukon Nobyembre, apang nagpaandam ro weather authorities nga pwede pang magpadayun ro dry season sa masunod nga mga domingo.
