KALIBO, Aklan—Dayon ro nakataeana nga Barangay ag Sangguniang Kabataan Election (BSKE) 2026 sa Nobyembre 2 hasta nga uwa it laye nga pirmado ni Pangueong Ferdinand Marcos Jr. nga uman raya nga mapaiway makaron nga dag-on.
Raya ro pagpaathag ni Rev. Fr. Atty. Jude Rebaldo kon sa siin pwede nga makaangkon it amendments pag-abot sa BSKE basta’t may laye nga nagamando kara.
Madumduman nga gin-aprubahan it House of Representatives ro hagna nga nagataeana it limang dag-ong termino para sa mga opisyal it barangay ag Sangguniang Kabataan (SK), nga may hasta sa daywang magkasunod nga termino sa parehong posisyon.
Kon naging laye, pagabayluhan kara ro ap-at nga dag-ong termino sa idaeom it Republic Act No. 12232.
Gintaeana man sa hagna nga ro masunod nga BSKE hay sa ikaywang Lunes it Nobyembre 2028 ag kada limang dag-on pagkatapos kara.
Apang sa makaron suno kay Rev. Fr. Atty. Rebaldo, hasta nga uwa it laye nga magapaiway sa eleksyon hay padayon gihapon ro aktibidad it commission on elections ukon Comelec.
Dugang pa nana nga may gahum ro mga lawmakers nga amyendahan ro naga-eksister nga laye angot sa BSKE.
Kon anu gidman suno kana ro magiging pinal nga desisyon it Kongreso ag ro igataeana sa laye angot sa iskedyul it eleksyon hay raya ro pagasundon.
