BORACAY, Island–Ginatantyang nagaabot eon sa 1.56 milyon ro tourist arrivals sa Boracay halin Enero hasta it Agosto 2026 rason nga nagapabiling posibleng maabot ro target nga 2.3 milyong turista makaron nga dag-on.
Nagapanguna sa mga dumueoong turista ro South Korea, United States ag China kamana man nataeopangdan ro haeos 69.2 porsiyentong pagtaas it mga turistang halin sa China kon ikumpara ko nagtaliwan nga dag-on.
Sa bilog nga nasyon, kapin sa 4.11 milyon ro foreign arrivals sa unang waeong buean it dag-on nga mas mataas it 3.7 porsiyento year-on-year.
Sa pihak kara, ginaeauman makaron nga makabulig sa turismo ro planong pagpaeapad it visa-free entry para sa mga Chinese traveler, kaibahan ro Caticlan bilang sambilog sa mga nagapangunang gateway.
Kadungan sa pag-umwad it turismo hay kinahang-ean man nga pabaskugon ro imprastraktura, healthcare ag power systems agud masolusyunan ro nagataas nga numero it mga bisita.
Madumduman nga ko buean it Agosto hay nakalista ro Malay-Boracay Tourism Office it kabilugang 160,160 tourists nga nagbisita sa isla.
Sa nasambit nga numero, 138,945 ro domestic tourist; 2,127 ro overseas Filipinos; ag 19,088 ro foreign tourist.
