Grabeng kahadlok ro naeksperyensiyahan it sangka doktor sa Richmond, Virginia matapos imaw nga magbugtaw ag matukiban nga may kuyapnit nga pilit nga nagasueod sa anang bibig samtang imaw hay nagakatueog.
Suno kay Dr. Krista Edelman, sangka gastroenterologist, una nana nga gin-eaum nga kaparte eamang it anang damgo ro nagakatabu. Sa anang panamgo, may maisot nga eanggam nga medyu nagasueod sa anang bibig.
Kat eubusan imaw nga mabugtaw, ginbuytan nana ro bagay sa anang uyahon. Una nana nga gin-eaum nga matsa may bueak, apang kat mabatyagan ro matag-od ag maga-eas nga balahibo, dikara nana na-realize nga kuyapnit ro anang ginabuytan.
Sa baylo nga patyon ro sapat, ginhana raya nga dakpon ni Edelman agud nga ipaidaeum sa eksaminasyon para sa rabies. Madinaeag-on nana raya nga nakulong gamit ro sangka maisot nga balde bago imaw nag-agto sa emergency department it ospital kun sa siin imaw nagatrabaho.
Suno sa mga health expert, kinahangean nga seryosohon ro makarondaya nga insidente bangud nga masyadong maisot ro mga ngipon it kuyapnit ag posibleng indi eagi mataeupangdan ro anang inangkitan.
Importante ro insigidang pag-usisa ag pagpa-check-up bangud nga makamaeatay ro rabies kon mag-umpisa eon ro mga sintomas.
Ginlaygayan ro publiko nga kun eowas nga madakpan ro kuyapnit, indi raya pagpatyon ag makipag-angot eagi sa local health authorities ukon animal control para sa tamang pag-usisa ag pag-giya.
Sa kaso ni Edelman, negatibo sa rabies ro kuyapnit nga nakit-an sa anang baeay.
