Hugut nga ginpamalibaran it Buckingham Palace ro alegasyon ni Charles Spencer, igmanghud it namatay nga si Princess Diana, nga ginhambae sigon ni King Charles III nga malipatan man nanda ro anang dating asawa matapos raya nga mamatay ko 1997.
Sa bag-ong libro ni Spencer, ginsaysay nana ro mga hitabu kasunod it pagkamatay ni Diana sa sangka car crash sa Paris.
Suno sa anang panaysayon nga nakaangkon sanda it diskusyon it kato hay si Prince Charles angot sa planong pagtikang nanday Prince William ag Prince Harry sa likod it kabaong it andang ina sa funeral procession.
Dugang pa ni Spencer, ginpaabot nana kato kay Prince Charles nga owa naila si Diana nga paga-agihan it andang mga unga ro kabudlay ag kasakit it nasambit nga seremonya.
Ginpamilit kara nga ginhambae sigon ni Prince Charles nga makalipatan man eagi nanda si Diana. Gin-akusahan man nana si Charles it pag-angkon sigon it bukon it mayad nga pagtrato sa anang dating asawa ag medyu masadya pa raya matapos ro pagkamatay ni Diana.
Sa sabat it Buckingham Palace, maskin nga owa sigon sanda kaeabanan nga nagatau it komento angot sa mga libro, apang nasayuran ni King Charles nga ro grabeng sakit it pagpangasubo sa pagkamatay it sangka igmanghud hay pwedeng makaapekto sa pag-iisip, pagsentensiya ag pag-handuraw sa mga hitabu, maskin nga maabung dag-on eon ro nagtaliwan.
Ro mga alegasyon hay kaparte it libro nga Swan Song: Diana, My Sister, nga nakataeanang iga-publish sa masunod nga domingo.
