Mas makapamayad para sa mga mailihir nga barangay officials nga mapaeawig sa limang dag-on ro andang termino agud nga maimplementar it husto ro mga programa ag proyekto sa komunidad.
Raya ro opinion ni Liga ng mga Barangay sa Aklan President Ranie Tolosa matapos nga gin-aprubahan it Senado sa ikatlong pagbasa, sa botong 13-5-0, ro Senate Bill No. 2387 nga magataeana sa limang dag-ong termino it mga opisyal it Barangay ag Sangguniang Kabataan (SK).
Suno kana, bukon it bastante ro tatlong dag-on sa termino agud nga maipatuman ro mga handom para sa kaumwaran it barangay.
Nasayuran nga sa presenteng laye, 4 nga dag-on ro termino it mga nailihir nga barangay ag Sangguniang Kabataan (SK) officials, sa idaeom it Republic Act No. 12232, nga ginpirmahan ko Agosto 2025
Ro masunod nga regular nga BSKE hay nakataeana sa Nobyembre 2 it presenteng dag-on.
Apang sa presenteng hagna, engkasong maging laye hay magiging limang dag-on ro termino it mga mailihir nga barangay ag SK officials.
Tuyo it nasambit nga hagna nga makaangkon it mas sigurado ag maayos nga sistema sa lokal nga pagdumaea agud malikawan ro pauman-uman nga pagpaiway it eleksyon kada nagadungan raya sa national election.
