Daywang tumaeagsahon ag mabahoe nga opah ukon mas kilaea sa tawag nga “tabas” o moonfish ro nadakpan sa kadagatan nga sakop it Caluya, Antique ko Setyembre 17.
Ginaboeobanta nga 80 kilo ro mas mabahoe nga isda samtang 60 kilo man ro sambilog. Suno sa biodiversity researcher nga si Flord Nicson Calawag, raya pa eamang ro ikaywang nailistang pagkadakop it opah sa Antique.
Nadakpan ro mga raya it grupong “Team El Mayor” gamit ro jig. Kaibahan man sa nadakpan ro sangka tumaeagsahon nga deep-water fish nga mas kilaea sa tawag nga “igit” ukon oilfish.
Ro daywang opah hay ginpanupod sa mga residente.
Tumaeagsahon ro opah bangud nga masarangan kara nga mapabilin nga mainit ro andang eawas kumpara sa nakapalibot nga tubi-dagat, nga nagatau kara it ikasarang nga magpabilin nga aktibo sa maeamig ag madaeum nga kadagatan.
Ro unang nailistang opah sa Antique hay 36 kilo ag nadakpan sa Barbaza ko Setyembre 2023.
