KALIBO, Aklan — Kapin sa 80 hasta 90 porsiyento eon ro kahauman it Dumaguit Port para sa pagbaton it mga barko, samtang ginaeauman nga magabukas ro operasyon kara pagkatapos eon it Undas.
Ginpahayag ni Niven Maquirang, Executive Assistant sa Office of the Provincial Governor ag Officer-in-Charge it Cruise Ship Operations, nagahueat pa ro provincial government it sabat halin sa StarLite Shipping angot sa pagbag-o sa schedule it andang biyahe.
Nauna eon nga ginsuestiyon ro operasyon kada Lunes, Miyerkules ag Biyernes, apang gusto raya nga bag-uhon kada Martes, Huwebes ag Sabado.
Natigayon eon sigon nga naisumite sa Maritime Industry Authority ukon MARINA ro schedule nga gin-aprubahan it Philippine Ports Authority ukon PPA rason nga ginahueat pa it provincial government sa shipping company kun magakinahangean pa it panibag-ong request bangud sa ginbag-o nga schedule.
Ginpasiguro man it shipping company nga owa it magiging problema sa andang commitment sa operasyon nga may ruta nga Batangas nga maga-agi sa San Agustin, Romblon ag Dumaguit.
Kaibahan sa mga nakataeanang iga-install sa pantalan ro cable ag internet para sa mga pasahero kamana man ro one-stop-shop parking ag ticketing system sa guwa agud nga malikawan ro paggutok sa pagsueod it it mga pasahero.
Samtang, ginkumpirma ni Maquirang nga may sangka shipping company halin sa Cebu nga nagpahayag it interes nga magdungka sa Dumaguit Port, apang presente pa nga gina-istoryahan ro posibleng operasyon kara.
Dugang pa kara nga padayun nga ginasueong it provincial government ro pagpaeapad it mga rutang pandagat agud nga mas pa nga mapabaskog ro kalakalan, turismo ag transportasyon it mga pasahero ag kargamento sa Aklan ag mga kaiping nga probinsiya.
