-- ADVERTISEMENT --

Padayun ro pagtaas it gina-import nga bugas sa Pilipinas matapos maapektuhan it El Niño ro lokal nga produksyon it paeay, nga nagtuga man it mabahoe nga kahalitan sa sektor it agrikultura.

Base sa datos it Bureau of Plant Industry (BPI), naga-abot eon sa 4.49 milyong metriko tonelada ro kabilugan nga importasyon it bugas sa nasyon hasta ko Oktubre 29, 2026. Mas mataas raya kumpara sa 3.39 milyong metriko tonelada nga nailista sa kaparehong tiempo ko nagtaliwan nga dag-on.

Nagapangunang ginaboe-an it imported rice ro Vietnam nga nakalista it 2.79 milyong metriko tonelada ukon katumbas it 62.3 porsiyento it kabilugang importasyon. Raya hay ginsundan it Thailand nga nakapadaea it masobra sa 666,000 metriko tonelada it bugas.

Suno sa Department of Agriculture (DA), ginaeauman nga maganaba it 900,000 hasta sang milyong metriko tonelada ro lokal nga produksyon it bugas bangud sa grabeng epekto it El Niño ag pagmaea it mga eugta nga gina-umhan.

Bangud kara, indi anay pagasuspindihon it gobyerno ro pag-import it bugas agud nga masiguro nga bastante ro suplay kara sa nasyon ag malikawan ro posibleng kakueangan sa merkado.

-- ADVERTISEMENT --

Padayun man nga ginabantayan it gobyerno ro kahimtangan it sektor it agrikultura agud nga masiguro ro seguridad sa pagkaon ag mapabilin ro bastanteng suplay it bugas para sa mga Pilipino.