POLICE Report — Arestado eon it mga awtoridad ro sangka eaeaking lango sa marijuana matapos kasuhan it simbahan it Minor Basilica sa Taal, Batangas.
Suno sa Taal police, gindakop nanda ro suspek nga nakilaea sa pangaean nga Angelo matapos raya nga pasakaan it kaso it simbahan sa pageabag sa Article 133 it Revised Penal Code ukon offending religious feelings.
Sa estasyon it pulisya, gin-aku it suspek nga gumamit imaw it marijuana para makaangkon it kabaskog it buot ro pagahimuon nga pagpangbastos sa sueod it simbahan ag intensyon nga sumikat sa social media.
Nagmadinaeag-on si Angelo sa anang pagsikat bangud nga nakita sa closed-circuit television camera ag nai-post sa online ro anang pagsueod sa simbahan sakay it motorsiklo angkas ro babayeng nobya kara bandang 11:00 it agahon ko Martes.
Makita sa video, dere-deretso nga nagsueod ro motorsiklo sa sueod it simbahan ag nagpundo sa atubang it altar.
Nahuya ro babayeng angkas rason nga insigida raya nga nagpanaw paguwa it simbahan samtang si Angelo hay nagsaka sa ibabaw it altar it Basilica ag nahimo pang mag-sign of the cross.
Nagpungko pa imaw sa pungkuan it pari ag nagpalakpak ag ginsaka ro siki.
Nakita pa nga ginsipa-sipa pa nana ro anang mga siki ag pagkatapos hay nagpanaw eon.
