Sigidas ro ginapatigayon nga coordination ag conferences it Aklan Police Provincial Office ukon APPO sa nagkaeain-eain nga partner agencies para sa preparasyon sa seguridad sa nakataeana nga Kalibo Sto. Niño Ati-Atihan Festival 2023.
Suno kay PCpl. Leonelyn Artes, tagapaghambae it Aklan PPO nga prayoridad nanda ro peace and order security measure para masikyar ro zero incident sa nasambit nga selebrasyon.
May nakapreparar nga major event security framework ro kapulisyahan para masigurado ro kaeowasan it mga turista, deboto ag bisita bukon eamang it sa selebrasyon it Ati-Atihan festival sa banwa it Kalibo kundi maging sa ibang kabanwahanan nga may kaparehas kara nga event.
Posible suno kana nga may mga additional forces it PNP bangud sa ginaeauman nga pagdagsa it maabong tawo maghalin sa mga kabanwahanan ag maging sa kaeapit nga probinsya matapos nga raya ro unang face to face celebration halin kat nagtuhaw ro pandemya sa bilog nga kalibutan.
