KALIBO, Aklan—Ginpakigbahin it sangka aklanon bar exam passer ro anang mga inagihan nga kabudlay sa 2024 bar examinations bangud sa pagiging working student.
Suno kay Atty Allen Retos it C. Quimpo St. Brgy. Poblacion Kalibo nga kada adlaw hay nakataeana imaw it maskin tatlong oras agud nga magbasa pagkatapos it anang trabaho sa Department of Environment and Natural Resources ukon DENR PENRO-Aklan.
Naging mabudlay sigon ro tests rason nga eubus ro anang kalipay matapos nga masayuran nga sambilog imaw sa mga nakapasar.
Bilang kauna-unahan nga abogado sa andang pamilya, ginpahayag ni Retos nga ginatun-an pa nana kon pagabatunon ro offer it pilang law firm nga gustong magbo-oe kana.
Ginpahayag dugang nga ro pagiging abogado hay ro anang childhood dream .
Kat magguwa sigon ro resulta it Bar examinations hay grabe ro kalipay nga andang nabatyagan it anang asawa nga masyadong supportive sigon kana kamana man ro anang bilog nga pamilya.
Nagbunga sigon ro anang hardwork ag pagpangamuyo .
Si Atty. Retos hay nagtapos it elementarya sa kalibo Pilot Elementary School, nag-eskwela sa Regional Science High School for Region 6 ag nagbo-oe it BA in Political Science sa West Visayas State University ag nag-tuon it law sa University of Sto Tomas.
Apang bangud sa kakueangan sa pinansiyal, nagpundo imaw ag nag-uli sa Aklan ag nagtrabaho.
Makataliwan ro waeong dag-on hay ginpadayun ro pag-eskwela it law sa aklan catholic college samtang nga nagatrabaho sa DENR .
