NUMANCIA, Aklan—Gin-umpisahan eon man it mga Aklanon Muslims ro Ramadan pinaagi sa pagpangamuyo.
Suno kay Gabriel Taratanto, secretary it Muslim Foundation sa Muslim Community sa Brgy. Camanci Norte, Numancia nga sa raya nga tiempo hay nagapangamuyo sanda ag naga-fasting ukon naga-ayuno.
Ginpaathag nana nga ro Ramadan ro pinaka sagrado nga buean sa Islamic calendar, kun sa siin naga-fasting ro mga Muslim umpisa pagbut-eak it adlaw hasta sa pagtunod it adlaw ag nagahaead it pangamuyo sandig sa turo it Islam.
Dugang pa nga raya man ro tiempo it pagpamaeandong ag pagbag-o it commitment sa pagtu-o para sa mga Muslim.
Owa sigon sanda it handum kundi ro kalinong ag paghiliusa it tanan.
Samtang, exempted suno kana sa fasting ro mga tawo nga may sakit, nagabiyahe, nabdos ag mga nanay nga nagapa-breastfeed ukon nagapasuso, babaye nga may menstruation, mga unga ag mga katigueangan.
