KALIBO, Aklan–Ginkumpirma it Civil Service Commission ukon CSC Regional Office 6 nga ro probinsiya it Aklan hay may an-um nga regional winners para sa makaron nga dag-on nga Search for Outstanding Government Workers.
Suno kay Leo Jamorin, Director II it CSC-Aklan nga ro nasambit nga an-um nga mga akeanon hay napili-an bilang regional winners sa tanan nga mga nominees nga nagsumite it aplikasyon para sa search makaron nga dag-on.
Ginpaathag ni Jamorin nga ro nasambit nga aktibidad hay nagatuyo nga makilaea ro 2023 Honor Awards Program regional winners.
Raya hay sangka kahigayunan man sigon para kanda agud nga maipa-ambit ro andang accomplishments kaibahan ro kaparehong regional winners.
Sa 6 nga regional winners it Aklan, ap-at kara hay naghalin sa Department of Education nga nagdaog sa idaeum it Dangal ng Bayan category.
Ro sambilog pa nga winner sa idaeum it nasambit nga kategorya hay naghalin sa lokal nga gobyerno it Madalag samtang ro sambilog pa nga nagdaog hay sangka professor it Aklan State University sa idaeum it Presidential Lingkod Bayan category.
Ginpahayag dugang nga kaeabanan sa mga nagdaog nga naghalin sa Deped-Aklan hay nagabuyot it mga matag-as nga posisyon sa andang natungdan nga mga eskwelahan nga nagpakita it mayad nga hinimuan ukon accomplishments bilang mga manugturo nga eubus nga nakabulig bukon eamang sa mga estudyante kundi sa komunidad sa pangkabilugan.
Ro bayan awardees hay ginaeakipan nanday Sharon R. Gungon, Master Teacher III; Ruel Z. Mia II, Master Teacher I; Renan N. Nacor, Head Teacher II ag Boby Rose R. Ricaforte, Master Teacher II.
Ro sambilog pang winner hay si Dr. Josephine P. Ricamonte, Rural Health Physician it LGU – Madalag.
Sa pihak nga parte, ro winner sa idaeum it Presidential Lingkod Bayan category hay si Julie Ann A. Salido, Professor III it Aklan State University.
Gindugang pa ni Jamorin nga ro nasambit nga mga regional winners hay may tyansa pa nga magdaog sa national level sa kaparehong search para makaron nga 2023.
Suno kay Jamorin nga malipayon imaw bangud nga kada dag-on hay maabu nga mga akeanon ro na-qualify bilang regional winners.
