KALIBO, Aklan—Ginakabig it Anak Pawis Partylist nga weapon ro Anti-Terrorism Act of 2020 kontra sa kapalpakan it gobyerno sa tunga it naga-iral nga krisis tuga it Covid-19 pandemic.
Suno kay Former Anak Pawis Partylist Representative Ariel Casilao, mataeopangdan sigon ro pagtinguha it gobyerno nga maging laye ro Anti-Terror Bill agud nga matabunan ro andang mga kapalpakan sa pagsukoe sa pandemya nga nagresulta sa pagbagsak it ekonomiya; maabong obrebo ro nawad-an it trabaho bangud sa pagsarado it mga negosyo; sigidas nga pagtinaas it kaso it Covid-19 sa nasyon ag ro naga-iral nga corruption sa mga ayuda nga para sa mga kubos nga Pilipino nga eubusang naapektuhan it pandemya.
Ginapatihan nga peligroso ro nasambit nga laye bangud posible sigon nga maabuso raya it mga una sa poder rason nga ginpadali raya nga mapasa nga uwa it maskin anong deliberasyon nga natabo.
Ro anda sigon nga grupo hay hugot nga nagapamaeabag sa hana nga implementasyon it nasambit nga laye rason nga sambilog man sanda sa mga nagdihon it petisyon sa Korte Suprema agud kontrahon ro laye nga ko kan-o eamang ginpirmahan ni Pangueong Rodrigo Duterte.
Suno pa kay Casilao, bukon it raya ro sabat sa ginapangatubang nga problema it nasyon nga tuga it pandemya.
