KALIBO, Aklan—Sangka away it mag-igkampod sa posisyon it pagka-alkalde ro ginabantayan sa banwa it Libacao sa eleksyon sa 2022.
Raya hay matapos nga desidido nga bangga-on ni incumbent Sangguniang Bayan member Napoleon Navarrosa ro anang first cousin nga si incumbent Mayor Charito Navarrosa.
Gin-aku ni Napoleon nga nakipag-istorya imaw kay Vice Mayor Vincent Navarrosa nga taw-an man imaw it pwesto sa maabot nga eleksyon, apang owa raya nataw-an it katumanan.
Tiempo man suno kana nga gintaw-an imaw it kahigayunan it grupo ni gubernatorial aspirant William Lachica nga maging kandidato nanda sa pagka-mayor rason nga insigida nana raya nga ginbaton.
Ulihing termino eon sigon nana sa pagka-konsehal, apang gusto pa nana nga padayunon ro pagpanerbisyo sa mga Libacaonon.
Nagbaskog pa suno kana ro anang buot nga banggaon si Mayor Charito kat magpaabot kana it suporta ro mga kilaea ag prominenteng tawo sa Libacao nga kaabuan sa mga raya hay nagatrabaho ag naga-istar eon sa ibang nasyon.
Nagaeaum man si Napoleon nga indi maging ugat it eainan nanda it buot it anang igkampod ro naging desisyon kara sa politika.
Sa pihak nga parte, mag-eowas kay Mayor Navarrosa nga uman nga magapa-ilihir sa pwesto, magiging ka-tandem gihapon kara ro anang unga nga si Vincent Navarosa.
Kaibahan man sa andang line-up it konsehal ro daywa pa kara nga unga nga sanday Ton-ton nga dati man nga SB member ag si Paul.
Haeos 30 sigon ro nag-file it pagka-SB member sa Libacao kaibahan ro pito sa anang linyada.
