KALIBO, Aklan — Gintaw-ana it penalidad ro sangka babaye matapos nga uwa nagpundo sa pagtikang samtang ginakanta ro pambansang awit nga “Lupang Hinirang” sa flag raising ceremony it Kalibo Municipal Police Station adlaw it Lunes.
Suno kay P/Supt. Richard Mepania, hepe it Kalibo PNP nga bandang alas-7:30 it agahon kat imaw mismo ro nakataeopangod sa babayeng nagadali-dali sa pagtikang nga nag-agi sa andang atubadngan.
Depensa it babaye nga nagadali-dali imaw sa kabaeaka nga ma-late sa trabaho sa sangka establisimento nga maeapit eamang sa taeatapan it pulisya.
Matapos nga nagpangayo it pasaylo, ginpakamayad ko hepe it pulisya nga inde eon lang raya pagpasakaan it kasong pag-eabag sa Republic Act 8491 ukon ro Flag and Heraldic Code.
Sa baylo, gin-imponeran raya it penalidad, kon sa siin obligadong magtambong sa dominggohang flag ceremony it pulisya kada Lunes sa sueod it sang buean.
Ginpahayag ni Mepania nga kinahang-eang magtindog, magta-o it respeto ag magsabay sa kanta ro tanan sa kada ginapatunog ro pambangsang awit.
Sa idaeom man sigon it nasambitang laye, ro mga tawong napamatud-ang nag-eabag hay pwedeng pamultahon it inde magnaba sa P5,000 ag indi magtaas sa P20,000, ag puwedeng makulong it inde magkueang sa sang dag-on.
Paga-imponeran it uman it penalidad sa kada pag-eabag.
